الكاتبة والأديبة سالمة المغربي
الكاتبة والأديبة سالمة المغربي

فضفضة واحدة ست “التغيير”…… للكاتبة والاديبة \ سالمة المغربى

رجعت من السفر بعد غياب أربع سنين.. قلت أروح أزور صاحبتي و أعملها مفاجأة.. نزلت منطقتها..معرفتش الشارع.. مع إني كنت حافظاه!
معلماه بمستشفى حكومي ع القمة و مدرسة ابتدائي راقية ع الناحية التانية و جنبها كشك حلويات صغير.. و تحت البيت مكتبة صغيرة و قصاده صيدلية.
إيه ده؟!
شفت مبنى كبير حصل فيه انفجار و راحت معالمه بين الأنقاض.
فين المستشفى؟!
و المدرسة كلها فوضى و المدرسين ع بابها بيدخنوا سجاير قدام تلاميذهم و اللي رايح و اللي جاي.
فين التعليم؟!
و كمان الكشك الإزالة شايلاه.. و بقى مكانه نصبة شاي وكلها زينة و أنوار.
فين البساطة؟!
دخلت شوية في الشارع لقيته أطول من امبارح و البيوت بقت عمارات و عددها زاد كمان.
عديت العمارات لحد خمسة و وقفت قصادها.. هو ده أكيد البيت.. لاااا.. دي عمارة برضه.
راح فين البيت؟!
بصيت ع المكتبة لقتها (سيبر) و ألعاب كمبيوتر .. و الصيدلية اتحولت لمحل عصير.. و مخلفات القصب مزبلة الدنيا.
فين النظافة و البلدية؟!
و المصيبة أن صوت الناس بقى عااااالي.
قلت فين الذوق؟!
شفت راجل كبير بيضرب عيل و واحدة ست ابنها بيمسح بكرامتها الأرض علشان عايزها تسيب له الشقة يتجوز فيها
بكيت ع المبادئ.
راجل قد أبويا ملامحه مش باينة من الطين اللي عليه.. بينكش في الزبالة اللي طفحت بره الصندوق و بيجمع علب و أكياس مليانة بلااااوي معرفش هيعمل بيها إيه!
والناس ماشية وكأنها شاربه مخدرات.
طيب إيه اللي ساكرهم كده؟!

خفت أسألهم عن البيت لأحسن يحسوا بغربتي وحد منهم يستغلني.
لقيت راجل تايه زي حالاتي حاطط إيده على بطنه وعينه بتدور على حاجة.. سأل ناس بصوت واطي عن مكان المسجد.. علشان يقضي فرضه أو حاجته في حمامه.. محدش جاوبه!
ركنت جنبه ع الرصيف شوية .. لقيته بيقولي:
_بقالي ساعتين محصور و عايز أفك مايه.. أعمل إيه؟
لقيتها فكرة كويسة تخلي الناس دي كلها تتجمع حوالينا .. ويهتموا بينا و يجاوبوا علينا.. قلت له:
_إيه رأيك نرقص و نغني؟
الراجل بص ليا بصه.. طبعا انتم فهمتوها.
لحقته قبل ما يجري مني وقلتله:
_يابا الحاج.. هو ده الحل الوحيد.
رد عليا:
_أنا لو اتهزيت هعملها ع روحي.
_يعني معندكش مانع تتهز؟
_معنديش .. بس أفك.
دخلت السيبر و أخدت كرسي و طبلت عليه و كمان غنيت أغنية مهرجانات.. قام الراجل هز وسطه و الناس كلها طلعت تتفرج و تصفق كمان.. الراجل اندمج و شلح جلابيته.. الناس زاد تصفيقهم.. الميه سرحت منه.. و الضحك زاد.
الراجل وقع من طوله ساكت.. و لا حد برضه اهتم.. غنايا اتقلب عويل.. قاموا مشيوا وسابوني.

اتحسرت على ناسي وبلدي.. قمت ناديت بأعلى صوت.. حرام عليكي ياااا ست .. كفاية تغيير.. أنا خلاص فيكي و منك تهت

عن misr

اضف رد

لن يتم نشر البريد الإلكتروني . الحقول المطلوبة مشار لها بـ *

*

يمكنك استخدام أكواد HTML والخصائص التالية: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>